La lettre en shimaoré

La lettre en shimaoré

Publiée par Lettre aux parents confinés sur Vendredi 15 mai 2020
Baruwa lini la wadzadé waliyo madrani

Tsasi ramadrani wadzadé na uwana karitsojuwa ralawa.
Karaparo dzoka anba rivitsé wakati mwingi na wanawatru raha na uwakati unu.
Unu dé uwakati walazimwani rihadisi na uwana watru wakati mwingi,raha na uwakati wavira mana rina inafasi.
Unu dé uwakati walazimwani rivulishiyé uwana na uwasayidiya harinaulaguzi ilé paré wa rongowé trogo zaenkili.
Unu dé wakati walazimwani rijuwé uwana zayidi mana rapiyyasi madrani, karitsojuwa ralawa.
Uhadisi na uwana watru iyo dé iliyo muhimu ilé paré rishindré rivitsé wakati mdziro unu vmoja, riké kogno moja, rabiyané izi trogo muhimu zizo zitso ritruliza.
Narihadisi nawana watru ilé riwasayidiyé hari na yama devwari yalikoli yawo.
Ramohadisi na uwana watru iyo itso tsongésa rilaguwé ya ma trisigo yawo, rilaguyé tséna na yi ufuzu yawo, trongo zizo dé zitso wasayidiyawo ata waindré mbéli.harina uwakati mdziro unu , na uwakati watsorégéyawo likoli.
Ya ma devwari yatolwayo na ilikoli anba yafagnilé dagoni, iyo bahati ikawo anba wadzadé na uwana watsopara laguwé vmoja.
Wanatsa watsojuwa wayélédzé wadzadé wawo zitru waziyéléwa, na izitru kawaziyéléwa, zitru zilo zinro awu zitru zilo gnangu.
Nahika vwa zitru anba mutru kaziyéléwa, atsojuwa aringé téléfoni ahiré zéna, awu zama, awu mwanzani, awu djirani ilé paré amuyélédzé ata ayéléwé.
Wadzadé watsojuwa wasayidiyé uwanatsa hari na ya ma devwari yawo, ata djéli wasifikiri anba kawaji.
Ya ma devwari mafundi wayatowawo, zizo zitru zikao anba wanatsa wojuwa uzifagna.
Bé vwa ma devwari tséna madziro anba wanatsa kawaji yafagna, vavo ilazimwani uwanatsa wa ringé uwakati wafikiri, ata washindré wayéléwé, wagnu wadzadé mutsojuwa tséna muwassayidiyé.
Vwa wakati anba ya ma devwari yoka madziro soifi, nahika kamusishindra mwawasayidiya, kavwasi taembu,wanatsa watsoyélédzéwa wahirégéya likoli.
Wanatsa wahivolwa ma devwari, wagnu wadzadé namuwadzisé zitru waziyéléwa moni na yama devwari yani, ata djéli wasirongowa anba kawayéléwa ata shitru.
Namuwambiyé halé mufikiriwo, ilé paré muzunguhé muyéléwé ya ma devwari vmoja.
Karisi zunguha uhodari, wala ujuzi bé risi zunguha riyéléwé vmoja.
Wadzadé wakao anba wasilaguwa luha yagina anba si dé iluha ilagulwayo likoli :
Ulaguwa iyo dé mutru urongowa na uvulishiya, dé watru ujidzana hari na iluha awu izi luha zikao anba mutru ana udzévu na uzo
Kulla luha iyo zunzuri, iyo muhimu mutru avinzéléyé ayi laguwé na umwana wahé mana itsokana manufa,na fayida.
Kulla luha itso kiri irumishihé wakati ikao anba mutru asitsaha a dzisé shitru, awu alaguwé, awu atrulizé, awu ayélédzé, awu atowé halé, awu atowé haséra, awu watru mahadisi, awu watru watséhé awu walaguwé vmoja.
Namurumiyé iluha ya uvénufu iliyo gnangu na wagnu, kamusilaguliyé uwana , luha ikayo anba yagnu kamwayidzéya.
Tséna Namulishé umwana wagnu atsahuwé iluha yamjiviya ayilaguwé , umuhimu dé watru huyéléwana.

Uvwamoja unu wo hiriwa «La diversité emsemble» : upangiha na wadzadé na mafundi, na wanaziyoni.


Vous aimerez aussi...

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *

Ce site utilise Akismet pour réduire les indésirables. En savoir plus sur comment les données de vos commentaires sont utilisées.

Rechercher dans OpenEdition Search

Vous allez être redirigé vers OpenEdition Search